قصيدة راح الخير والبراكة

راح الخير والبراكة
بسم الله ديــــــــــما بيها نبدا لكـلام  **      ورسول الله أنا وياكم نصلوا عليــــه
الدنيا يالناس راهي مجرد أيـــــــام    **   الليل كي النهاروالعبد لربي يمد إيديه
يازارع الخير شد فربي وقدم لقدام     **   وزارع الشر يجي نهار ويندم عليــه
ياسامعين وين راحوا دوك لعـــوام      **  راح الخير والبركة راهـــي تبع فيه
صاحبي كي خويا فالنهار والظلام**         وفقربيش الطالب يزيد يجمعني بيه
نقراو كتاب ربي وسيـــــــرة لقدام  **       والعبقري بحب الصلاة نبغيـــــــــه
والبصيري زاد عرفنا بخير الأنام      **   محــمد رسول الله زيدو صلوا عليه
يالناس وين راحوا دوك لعـــــوام       **  راح الخير, والبركة راهــي تبع فيه
تبدلت الدنيا ومـــــــابقا فيها تقسام**         كثر فيها لحسد والناس فارحيـن بيه
خو ياكل خو وبليس قال نعــــــام  **        والطالب جبد روحو الحق تلبد عليه
لكدب تعرق والتنوفيق فلكـــــــلام     **    وبنادم الصراحة مــــــــابقات تنجيه
القلب تعمر ولعقل زاد تخمـــــــام    **     والضمير مـــــــات والخدع كبر بيه
والمـــــــــــال يبدل لخوال ولعمام **        ليتم اليوم قـــــــــاع العايلة تراضيه
يالناس وين راحوا دوك لعـــــوام    **     راح الخير, والبركة راهــي تبع فيه
لمرا بغات المســـــــاواة فالإسلام       **  والراجل يريح وهي تصرف عليـــه
ونسات بلاصتها فالشرع والاحكام  **      ونسات المؤودة والسبية ماعليـــــــه
الحجاب صاب صكة قلدو لــــفلام **       اللباس الواسع البنت لختها, ضيقــيه
الزمان تغير والديب مـــا بقا يتلام    **    النعجة إلى ماجاتو الصباح تمسيــــه
وعلى رجال المستقبل يـــــــاسلام      **  الراس فارغ والجهل, ويخرج سنيـه
ونصهم تلقـــــــــــاه راخف لحزام**        لا قدر لا احترام الشـــــــارع مربيه
بالدخان والزطلة يتسقم لكـــــــلام   **     هدا كلامهم راني نعــــــــــــــاود فيه
لفهامة زايدة وفالصح كي النعـــام      **  وفدين الله رد بالك تسقسيـــــــــــــــه
ومولانا رجعوه كي الما فلفــــــام **        ويواجب الوالدين وعليهم يهز فيديـه
معاهم الحلاق ولا يخدم رســـــام   **      بنادم يخرج ديك على رجليـــــــــــه
ما تفهم مرا ولا راجل  ياســــلام    **     اللباس اللي يلبس فلمشية يخرج عليه
يالناس وين راحوا دوك لعـــــوام    **     راح الخير, والبركة راهــي تبع فيه
كلمة أمي ولات كلمة أوهــــــــام    **     ولعجوزة والشبانية واقع مــــا نخبيه
والبو الوالد تعلقت ليه وســــــــام    **     وبويا كلمة صعيــــــــــــب تنقال ليه
والمعلم هاد الوقت ما ليه مقـــــام  **       اللي قراه الصباح عشية ينسيـــــــــه
يفاتن العيل وتسمع معاهم أنغـــام   **      وبليس طمن قليل وين يجيـــــــــــــه
البورتابل غنية مشهورة فالأقسام **         البيباج والميساج بلغنا الجديد يسييـه
راحت الفقارة مع الاخوة فالتقسام     **    وهاد الوقت الكل مسكر حاسيــــــــه
الدنيا دي ياخوا مجرد أحـــــــلام  **       نصها يتحقق والنص لاتسال عليــــه
ولاخرة فعايل ماهي قــول وكلام**         مول الخير للخير وربي يجازيـــــــه
والفرع اللي فاسد دواه التقـــــلام       **  والعود الصالح الساس راه معليــــــه
اعرف واش تهدر ومشي بالتبسام     **   والي خدع الله يهدينا ويهديـــــــــــــه
عيش فالدنيا لربي رافع لعـــــلام     **    ولمريض اليوم الرجعة لربي تداويه
فليلة من الليالي قبل لمنـــــــــــام      **   دارت أفكار وتاريخ شحــــــال نبغيه
ترجمتو فورقة بقلم من الأقــــلام     **    نابع من القلب والزمان ساقيــــــــــه
لاإله إلا الله نختم بيها لكــــــــلام    **     محمد رسول الله زيدو صلوا عليـــــــه

                                                        القلم الجريح
                                                    حاجي محمد عبد الكريم

قصيدة رائعة وهي تعكس الواقع المعيش ياليت الشباب من الجنسين يتعظون منها ويحاولون إلتماس الدروس لخدمة حياتهم والابتعاد عن المغامرات العمياء.

مشكور على مرورك استاذي الكريم

أما بعد:
كل الشكر موصول للقلم الجريح على هذه القصيدة الشعرية الشعبية المتميزة  التي تحاكي واقعنا المعاش المرير ، تبقى قضية الخير يا أخي عبدالكريم فالخير سيظل موجودا  إلى أن يرث الله  الأرض ومن عليها-صح لسانك- دام صوتك شعراً *******لاإله إلا الله نختم بيها لكــــــــلام    **     محمد رسول الله زيدو صلوا عليـــــــه******* صلى الله عليه وسلم

مشكور على مرورك اخي وخليلي وحبيبي عبد الله

الخير باق... والنبل باق.. والحِلم باق... الحب باق... والاحترام باق... والتواضع باق...ووو ولكن؟ أين نحن؟؟؟

الكل باق..... لكن الضمير معاق.... مريض وينقصه الترياق ...اني اراه في الاسواق ....يباع ويشترى بالنفاق ...... ونحن هنا ننظر لكن كل لامره يساق

شكرا على مرورك العطر